Grias Eich!
Es kennts jo bestimmt alle die Vespa Roller, die sand jo seit jeher ein Kultobjekt, kaun ma sogn, wos soviel heisst als wie die Grosseltern ham schon einen in den 50er Jahren habn wollen, den Eltern hät er in den 80er gfoin, und heute träumen scho die Enkerl von einer Vespa.
Wie gsagt, wollen haben viele eine, ghabt ham nur wenige a so a schönes Stückl, denn büllig warns nie, die Vespas!
Na jo, so mauncher der sich in seiner Jugendzeit koa Vespa hat leistn kinna, der kauft si daun in fuatgeschrittenen Alter a so ein schönes Stück, maunchmoi is die Vespa dann scho glei älter ois wia der Besitzer, oba na jo, hauptsach ma hot eine!
A so einer, der a immer von ana Vespa geträumt hat, woa der Bert, nennan man hoit aso. Wobei bei eam net des fehlende Geld der Grund woa, dass er sich kane kauft hot, sei Verhinderung woa gaunz a oafoche: Er hot kan A Führerschein!
Na jo, vor ein paar Jahrn, da habns ja daun a neichs Gesetz ausibrocht, des was besagt, dass ma a mit an B Führerschein mit a poa klane Auflagn ein sogenanntes Leichtmotorradl lenken derf. Das des meiste was in de Klasse da einifoit, diverse Motorroller san, hat dem Bert zum Denkn gebn. „Öha, hiatzt wird’s wos, mit ana Vespa“ hot si da Bert denkt, „wäu hiatztn derf i a foan damit!“ Oisdann is er auf die Suche gaunga, noch an feschen Vespa, die was aus seiner Jugendzeit is. Hät ruhig a bissl verbraucht sei kinna, er hätt eh vuaghobt, das er sis wida fesch zaumricht. Na jo, wie er daun die Preise gsegn hot, die was für a oide Vespa heutzutage zahlt werdn, da is eam schu wieda vergaunga. „Loss mas gehen, des wird nix!“ hat er si gsogt. Doch dann, es is nu goa net so laung her, da hot eam a Freind augredt, und hat eam den Vurschlag gmacht, er soit si hoit an Puch Roller besurgn, den derf ma ah mitn B-Schein fohrn, und um a Trumm bülliger wia a Vespa is er a!
Na guat, des is dem Bert gscheit einigaunga, und auf kurz oder lang hot er an schen Puch Roller hoamzaht, gaunz günstig, und relativ komplett. Obwoi er koa Mechaniker oda Intschenier is, hat er den Roller gaunz sauber neich aufbaut, wos er net sölber zaumbrocht hat, do is er zu Fachleit gaunga oda hot Freind und Verwandtschaft einteilt. Dass der Bert nebenbei a poa bahnbrechende Erfindungen gmacht hat, sei ebenfois hier erwähnt: So hat er zu Beispül herausgefunden, dass ma an Gschirrspüler gaunz prima zum Teilereinigen verwenden kann….
Na jo, schliesslich war der Roller ferti restauriert, der Bert hat auch in der Zwischenzeit ois erledigt und gmocht was notwendi war, damit er sein Fahrerlaubnis für die Leichtmotorradln kriagt, und wie er si sein neichn Führerschein oghoit hat, da hat er daunn a glei den Beamten dort gfragt, ob des jetzt eh passt, dass er mit sein neichn Puch Roller foan derf. „Wos isn des fia oana?“ hat der Beamte gfrogt, und der Bert hat eam scheh brav geaunwortet, es is a Puch 150er SR. „Na do geht gor nix!“ hat der Beamte drauf gsogt, und hat dem Bert erklärt, dass ein Leichtmotorradl netta 125 ccm habn dearf!
Uihh, dea hots den Bert draufhin glei zwoamoi zaumzogn. Des erschte Moi, wie er gheart hot, er dearf mit sein neichn Roller do net foahn, und des zweite Moi, wie er die gaunze Gschicht daun seiner in Angetrauten gebeichtet hat. Da is nämli derHaussegn daun gscheit schief ghängt, von wegn sinnlos Göd aussihaun und so.
Aber wos er si da hat genau anhurchn miassn, oder was er daun sein Spezi dazöhlt hat, der eam den Roller verkauft hat, und eam eingredt hat, den dearf ma mitn B-Führerschein foan, des erfahrts vu mir net, denn I kann a sehr verschwiegen sein, wanns drauf ankommt, was auch von euch hofft,
Euer Michl
PS: Falls hiatzt wer glaubt, da wär a schön restaurierter Puch Roller büllig zum haben, muass i eich enttäuschn, der is scho verkauft wurdn. Na hoffentlich hat der neiche Besitzer den richtigen Führerschein, wissts eh ...
Grias Eich!
Es werds es jo gwiss a schon amoi geshn ham, das der eine oder andere auf seiner oidn Maschin einen Beiwagn draufgeschraubt hat. Is jo a a gaunz a praktische Gschicht, so ein Beiwagn: Man kann mehr Fahrgäst mitnehmen, und umfoin kann ma mit a so einem Gespann, wie es manche nennen, a net. Der Nachteil von dem Gaunzn is hoit, das des Gespann hoit scho von Haus aus schwera is, ois wia ein Solo Motorradl, und waun dann a nu drei Leit auf der Kraxn unterwegs san, dann kanns hoit scho a bissl zach werdn, wann net gnuag Leistung dahintersteckt.
Gaunz genauso is es vor an zeitl dem Koal gaunga (Des war allerdings a aunderer Koal ois wia der von dem wir des letzte Mal gredt ham). Oiso, nämlicher Koal hot damals ois erstas a oite 250er Maschin von an Misthaufn daherzaht, und wie er se de Maschin hoit grod neich aufbaut hat, do is eam a nu a passender Beiwagn zuatragn wordn. Na ja, den hat der Koal dann a nu aufigschraubt, auf die arme Zwafuffzger, die eh schon vo Haus aus net recht vü Leistung ghobt hat. Und wie es sich hoit dann a poa moi ergebn hat, dass zu dritt mit dem Schnaufal unterwegs warn, und dabei scho glei bei an jedn Berg von de Puch Maxi überhoit wordn san, da hats dem Koal greicht: „Der Beiwagn muass wieda obi, des bringt nix“ hot er si gsogt, und hat sei Maschin von der zusätzlichen Last befreit. Na ja, natürli is glei amoi aufgfalln, dass er nur mehr mit der Solomaschin unterwegs war, und da habn eam hoit daun die andern Oldeimerfahrer gfragt, was er den mit sein Beiwagn vorhat. „Verkafn tua ihn“ hat der Koal draufhin an jedn gsogt, ders wissen hat woin.
Und aso hats hoit daun a einer erfahren, nennen wir ihn einfach Hauns, dass da ein Beiwagn zum haben is. Draufhin hat er den Koal angredt, ob er den Beiwagn kaufn könnt, weil daun könnt er sei Weiberl mitnehma, wauns wieder amoi a Motorradloldeimerausfahrt gibt, weil aufn Sozius, da bringt er sie net auffi. „Passt scho!“ hat der Koal gsagt und hat sein Beiwagn und ois was dazughört auf an Anhänger packt und is zum Hauns umigfoan. Dort hams dann ois obigramt und in Hauns sei Garasch einitrogn. Was dem Koal aber scho die gaunze Zeit aufgfoin is, war die Tatsache, das dem Hauns sei Angetraute mit an recht an bösn Gsicht oiwei beim Fenster ausigschaut hat, was denn die zwoa da treibn. Na ja, zuletzt is dann zum Zahln gwesn, und der Hauns hat dem Koal die paar hundert Schilling umigebn, die was er für den Beiwagn hat habn wolln. Nau, und genau in dem Moment gehts Fenster auf, und ma hat a laute Stimm ghört: „Haaauuuns, kimm sofoat amoi eini do!“ Der Hauns ois brava Ehemann hat natürli sofort dem Wunsche seiner Göttergattin Folge geleistet, und is ins Haus eini. Hui, da is daun laut wurdn drin. Zerscht hat der Koal net wirkli verstaunden, um was da gangen is, aber daun hat er gaunz deitlich ghört, wies gheissn hat „Jo moanst denn das i mi in aso a Kraxn do einisitz, dir gehts jo net guat!“ „Auweh! Do hängt der Haussegn oba gscheit schief jetztn!“ hat si der Koal denkt, und hat si sche stüll und heimli ins Auto gsetzt und woit wieda hoanfoahn. Des Göd hat er ja scho in der Taschn ghabt, und für die ehelichen Dispute von aundere hat er si eigentlich net zuaständig gefühlt.
Da is eam auf amoi der Hauns nachigrennt kumma, und hat eam nu amoi aufghoitn. „Du Koal, bist recht bes, waun i den Beiwagn do net nimm?“ hat er gfragt. Na ja, der Koal is hoit ein recht ein anständiger Mensch, der was an andern hoit ah kann Ärger wünscht, drum hat er hoit zähneknirschend des Göd wieder zruckgebn, und daun haums den ganzn Haufn wieder am Koal sein Anhänger aufigramt, auf das er sei Sache wieder mit heim nehma kann.
So is hoit nixi wurdn mit an Beiwagn fürn Hauns, dafür hat er si daun a zeitl drauf ein Oldeimer Automobüll kaft, damit er sei Holde standesgemäss chauffieren kann, wauns amoi zu an Oldeimertreffen mitfoan wüll. Er is hoit nu ein Kawalir der altn Schule, der Hauns, der was seiner Frau an jedn Wunsch erfüllt, was auch von euch hofft,
Euer Michl
Grias Eich!
Bei de oitn Autos und Motorradln do is es hoit öfters aso, dass die Kraxna net imma so woin, wie sie solltn. Drum mochns hoit manche aso, dass sie net nur oa so a oits Trum mitnehmen, wauns zu einem Oldeimertreffn foarn, sondan dass sie no a zweits Fahrzeug in da Reserve mithaum, ma waas jo net! Zu dem gaunzn foit ma do a gschichtl ein, des wos sich vor launger Zeit – 25 Jahr werdns scho sein – bei einer Oldeimer-Fahrt zugetragn hat.
Oisdann, de Gschicht war aso: Ein Oldeimerfreund, nennan man hoit Koal, der hat ein paar schöne oite Stückln ghabt, und da hat er sie hoit amoi denkt, jetzt soit ma do a amoi bei so einer Bergwertung mitfoan! Er hat hoit dann sei besseres Stückl einpackt, in sein Transportbus, und wie der eh gross gnua war, hat er glei nu a zweite Maschin a dazupackt, ma waas jo net. Daun is er ehzeit in der Fruah fortgfoan, mit sein Tranporter un de Motorradln, auf das er ja rechtzeitig beim Start is. Na jo, wie er sei erst Maschin auspackt und angstart hat, is ja zerst no zu seiner grösstn Freid gaunz guat glaufn, dann hats auf einmal a poa komische Geräusche von sich gebn, und aus wors, mit da Freid! Na jo, hat si der Koal denkt, muass i ma dahoam anschaun, oba macht ja nix, i hab ja eh die zweite Maschin a mit! Hats oisa ausgräumt aus sein Bus, die zweite Kraxn, und woits anstartn. Nur hat de Luade net wolln. Gar nix is gaunga. „A so a Mist“, hat si der Koal denkt, und woit scho zampackn und hamfoan, da is eam ein anderer Oldeimerfreund in Weg grennt, nennan man den Fraunz.
Na ja, auch der Fraunz hat ein zweits Motorradl mitghabt – es wissts eh warum – und nachdem sei erste Maschin prima glaufn is, hat er hoit dem Koal die zweite Kraxn borgt, damit er mitfoan kaun.
Und so is hoit dann auch der Koal gestartet, und is mit der ausborgten Maschin losgfoan. Hiter eam is oana vo seine Spezis gestartet, und nach ein paar Kurvn sieht er doch glatt den Koal in der Wiesn liegn, hat si nimma bewegt, der Helm a poa Meter von eam weg, und de auborgte Maschin is bei an Holzhaufn hiebeigloant. „Um Hümmels Wülln, den Koal hats aufgstellt!“ hat er si denkt. Aso is er hoit stehnbliebm und is hingrennt zum Koal. „Hearst, is da was passiert?“ hot er scho von da Weitn gschrien. Da hat der Koal auf anmal gsogt „Losst mi do olle in Ruah, i wü nur do in der Wiesn liegn bleibm!“ „Hearst , hots di aufgstöllt?“ hat der andere nu amoi nachgfragt. „Na, I hob mi freiwüllig da her glegt“ hat der Koal gsagt, „und jetzt schleich di, und lass mi in Ruah! I foa heit nimmer weiter!“
Na, inzwischen habm si auch schon einige andere da beim Koal eingfunden ghabt, und san rundherum gstaundn um eahm, un do war a der Fraunz dabei. Und der hat den Koal natürli a glei gfrogt, warum er net weiterfoan wü, mit seiner Maschin. „Na, wie koa Benzin drin is!“ hot der Koarl gschrien. Draufhin hat der Fraunz gaun trockn gsagt „Na, waun i dir die Kraxn scho borg, soit is vielleicht volltanken a no?“
Na jo, wias hoit so is bei solchene Gschichtln, wer den Schadn hat der braucht fürn Spott net sorgn, und über die Gschicht von Koal hams nu lang glacht, de oan gaunz offn, die mehrern oba hoamli. Und a poa haum in Fraunz natürli a recht gebn, und haum gsagt, na nochschaun hät er scho kinna, der Koal, ob a Benzin im Tank drin is. Da Koal hat oba aus der Gschicht glernt, und hat seitdem oiwai a poa Kanister mit Benzin mitghabt, fois er se wieder amoi a Motorradl ausburgn muass!
Na jo, des war jetzt ein gaunz guates Teiming, wie man heutzutage sagt, denn grad denmoment hat mir die meinige, die Micheline oiso, grod einigschrian ins Zimmer, dass das Essn ferti is, und drum wird i mir jetzt das Bratl schmeckn lassn, was auch von euch hofft,
Euer Michl
Grias Eich!
I mechat mi heit a kloans bissal vurstölln bei eich, damits ihr a wissts, wer doda hinkünftig so seinen Senf dazugeben wird!
Oisdann, wer da aus der Gegend is, der kennt mi sicher - oder ah net. Nennen tans mi den Michl vom Hinterwald, oba meine Freind die sogn grod amoi Michl zu mia! Vielleicht kennts es in oitn Michl nuh, den von Schnoinberg, des is a gaunz a weiterster Verwandter von mia. Obwoi Dleit sogn, das i genauso schreib wie er, vielleicht hob is des jo gor nu gerbt von eam, wer was?
Na jo, I mechat do in diesem Forum so manche Gschichtln einischreibm, lustige und vielleicht a so maunches wos a bissl zum nochdenka is. Einfalln tan ma gnua Gschichtln, die wos i zum teil sölba dalebt hobt, oda de wos ma dleit hoit so dazählt ham, in die letzten Jahr! Laung gnua bin i jo scho dabei bei dera Oldeimerei, da Boat is ma scho laung und grau wurdn dabei, da kriegst so manches mit.
Oba wauns es a lustige Gschichtln wissts, daun schreibts mas oafoch, es kinnts eng sicher sei, dos da koa Sterbenswörtlein weiter geht, von wem da was neichs zu mia zubitrogn worn is, denn verschwiegen woa i scho imma, des sogt auch die meinige, die Micheline oiso, de was mia grod einigschrian hot ins Zimmer, dass da Kafee ferti is, und den werd i jetzt trinken gehn, was auch von euch hofft,
Euer Michl
PS: I hob a eine sogenannte e-mail Adresse: michl@omac-steyr.at - fois ihr mir amoi a poa gschichtln einidruckn woits, wissts eh ...
Sie sind vermutlich noch nicht im Forum angemeldet - Klicken Sie hier um sich kostenlos anzumelden
12.12.2011 09:20